中環都爹利街石階和煤氣燈見證著香港發展和變遷，也堪稱本港浪漫地標。中華煤氣（0003）最近喺金鐘太古廣場舉辦「細看中西區微型展」，以1比24嘅比例複製都爹利街煤氣燈，而最近仲加埋香港人氣男團MIRROR成員Anson Lo盧瀚霆嘅人型公仔，順手重現埋《社內相親》入面嘅一幕。
其實煤氣街燈已經喺1979年被列為香港嘅法定古蹟，同時亦都係唔少經典影視作品嘅拍攝場景，而煤氣公司亦喺展覽都加入《夢伴》入面嘅梅艷芳、《喜劇之王》入面嘅張柏芝同周星馳，同埋《金枝玉葉》入面嘅張國榮嘅迷你人形公仔，重現佢哋喺都爹利街石階嘅經典畫面。
煤氣公司常務董事黃維義就話，希望透過呢次展覽，可以俾大眾細緻咁欣賞都爹利街嘅煤氣燈，有多一個角度去感受香港嘅變遷。
