明報APP
報章內容
牛丼店松屋攻港 預告夏天開幕
【明報專訊】再有日本餐飲品牌攻港，今次更係港人最愛嘅牛肉丼飯！同吉野家、食其家齊名、被稱為「牛丼御三家」嘅松屋最新喺facebook成立專頁，名為「松屋Matsuya香港」，並預告將喺今年夏天開幕。另松屋亦開始招聘香港分店員工，網上招聘資訊顯示，松屋首間分店很大機會落戶油尖旺區，策略同5年前食其家攻港一致。
唔少網民對松屋進軍香港感到興奮，紛紛去松屋fb留言，更加話「終於唔使特登過去日本食」。松屋成立於1966年，一向以平靚正見稱，官網顯示大碗牛肉飯送埋味噌湯都只係560日圓（折合約28港元），相信唔少人都好期待！
其實早於今年1月初，有網民發現松屋已成立直屬日本總部嘅香港子公司，一度盛傳松屋會來港開設分店，惟日本方面一直未有消息，希望分店未來都可以愈開愈多啦。