【明報專訊】匯控（0005）上月初股價曾經返去90元以上嘅15年新高，小琴喺噚日香港非正式股東會問過唔少小股東，都話滿意股價表現，仲有股東想有返以股代息選擇，方便儲匯控股票。
不過，匯控今年派發可以摺埋嘅背囊就唔係個個鍾意，有股東喺問答時話好多股東以為匯控160周年會有特別禮品，「點知淨係送個咁嘅袋」，又話個袋用尼龍做而唔係布袋，唔環保喎。
匯豐香港區行政總裁林慧虹回應，佢哋想就160周年畀股東小小心意，佢哋會聽取提議。 其實除咗背囊，匯控今年仲送咗一盒小點心，入面有曲奇、脯乾同綠茶。不過講開又講，今年匯豐推出嘅160周年利市封套裝相當受歡迎，有股東反映未來禮品可以「益咗股東先」。
有股東問股價可唔可以升番去紅底，匯控主席杜嘉祺話唔會預測股價，但係股價升，證明投資者和股東對佢哋財務表現和增長目標有信心。
email: financepage@mingpao.com
