明報APP
即時地產新聞
【安享晚年】李小加父母租住廣東長者屋
香港人口持續老化，對安老院服務需求愈來愈大，部分安老院收費貴之餘，服務都唔見得係好，加上近年不時爆出護理員虐老事件，嚇怕唔少老人家，所以有人會選擇到物價較低、生活節奏比較慢嘅內地養老，當中包括港交所（0388）行政總裁李小加嘅父母。
同類房間月租6000元人仔
聽聞，李小加父母大約半年前，移居到廣東省一家長者屋，租住項目提供嘅雙人套房。同類型嘅房間現時月租大約6000元人民幣，建築面積約600方呎，房間外連露台，附有暖燈無障礙浴室，而費用包食宿，同時會按長者所需嘅護理級別，收取額外護理費。
不過，小琴相信李生李太睇中嘅其實係長者屋提供嘅中西醫療服務兼復康中心，因為李太之前曾經中風，影響半邊身嘅活動能力，但經過治療同護理員照料之後，目前已經漸漸康復。兩老嘅起居生活都有專人服侍周到，精神唔錯， 眼見李太跟身邊嘅護理員有講有笑，關係相當好。
李小加母親曾中風
有幸同李生李太喺午餐時間傾談過，李生嘅幽默輕易令同枱人開懷大笑，而李太嘅個性樂觀，非常好相處，所以兩老喺長者屋結交好多朋友，當中更包括來自香港嘅長者。家住赤柱獨立屋嘅李小加都成日抽時間去長者屋探望父母，過時過節更加會同兩老一齊參加長者屋舉辦嘅活動。