明報APP
即時財經新聞
財經花生|鄭家「家有喜事」 三公子鄭志亮本周「小登科」
新世界發展（0017）鄭氏家族「家有喜事」，鄭家純三子嘅鄭志亮（Christopher）將於今個星期踏入人生另一階段，脫離鑽石王老五行列，迎娶「Tina Huang」！佢個婚宴當然選址喺佢家姐鄭志雯管理嘅Rosewood瑰麗酒店。
大家呢排咁關心鄭家消息，主人家想低調舉行婚宴都有啲困難呢。據消息透露，鄭家會於本周二傍晚，在Rosewood為鄭志亮舉行結婚酒會，屆時將有不少政商界名人出席。但主人家想保持低調，酒會後只會進行家宴，不會大宴親朋。
喺哈佛大學畢業嘅鄭志亮其實來頭不小，加入家族企業之前，曾經喺里昂同對沖基金天元資本等多家金融機構任職，管理各種對沖基金同多種產品嘅預訂及執行交易服務。今年8月，鄭志亮更同鄭裕彤外孫女婿曾安業、新創建（0659）聯席行政總裁何智恒，齊齊出任家族旗艦周大福企業聯席行政總裁。