財經花生｜壽司郎母企今夏在港開首間居酒屋海外分店

日本迴轉壽司店「壽司郎」近年密密喺香港「插旗」，短短兩年已經開咗15間分店。香港壽司郎母公司FOOD & LIFE Companies最新就宣布，今個夏天將會喺灣仔開設旗下居酒屋品牌「杉玉SUGIDAMA」首間海外分店！

集團就話，同壽司郎理念一樣，杉玉希望以大眾化價錢為顧客提供充滿創意嘅居酒屋料理、玩味無限嘅餐飲氛圍，並藉此成為適合唔同受眾嘅相聚地點，例如男士們夜晚小酌、情侶約會、閨蜜假日相聚，以及家庭聚會等，為大家帶嚟唔同驚喜。

講起杉玉呢個名，其實係源自日本傳統釀酒文化，每逢酒商有新酒釀成都會於喺店門前屋簷下掛上以新鮮採摘的杉樹枝葉綑綁製成嘅渾圓球體，即係杉玉；當青綠色嘅杉玉逐漸變成茶色，就代表釀製嘅清酒已經熟成。所以集團嘅居酒屋都以此命名，喻意為顧客帶來各式各樣嘅日本清酒及日本料理。

壽司郎喺香港幾乎每間分店都大排長龍，之前仲有「黃牛」炒排隊飛嘅情況出現；相信今次開居酒屋，一眾狂迷都會仆倒去捧場！

文：祖師

其他報道

Prenetics獲鄭志剛SPAC收購 18日美股上市